fbpx

Ո՞վ է բլոքչեյն ծրագրավորողը և ինչպե՞ս դառնալ այդ մասնագետը

16/09/2022
theme photonbsp| WEBSTART

Չնայած տեխնոլոգիաների արագ զարգացմանը, շատերս դեռ չենք հասցրել հարմարվել նոր հասկացություններին՝ բլոքչեյն , NFT և այլն։ Այս նյութով որոշել ենք ծանոթացնել բլոքչեյն տեխնոլոգիաներին և, եթե ծրագրավորող ես, ցույց տալ, թե ինչպես կարող ես մասնագիտացումդ փոխել դեպի էլ ավելի արդիական ուղղություն։ Նախ պատասխանենք մի պարզ հարցի՝
Ի՞նչ է բլոքչեյնը

Բլոկչեյնը տվյալների բազայի տեսակ է, որն օգտագործվում է ինֆորմացիայի պահպանման և փոխանցման համար: Մեզ ծանոթ տվյալների բազաները տեղեկատվությունը դասավորում են ըստ տողերի և սյունակների, որոնք կազմում են աղյուսակներ: Սա հեշտացնում է ինֆորմացիայի դասակարգումը համակարգիչների համար: Բլոկչեյններով, սակայն, այն թվային ձևաչափով է և հավաքվում է կլաստերների կամ բլոկերի մեջ (block): Յուրաքանչյուր բլոկ ունի սահմանափակ պահեստային հզորություն:

Այդ հզորության լիմիտը հատելուց հետո բլոկը փակվում է և կրիպտոգրաֆիայի միջոցով կապվում է նախորդ բլոկին՝ ստեղծելով շղթա (chain): Կրիպտոգրաֆիան ստեղծում է անփոփոխ ժամանականիշ՝ կապելով մի բլոկը մյուսին (block+chain): Դասական տվյալների բազաները, մյուս կողմից, սովորաբար վերահսկվում են կենտրոնացված համակարգի կողմից:

Բլոկչեյնի հետ կապված գլխավոր հարցի պատասխանը ստացանք, սակայն ի՞նչ է բլոկչեյն ծրագրավորումը և արդյոք այն կապ ունի՞ մեզ հայտնի կայքերի ստեղծման հետ։

Ի՞նչ է բլոկչեյն ծրագրավորումը

Բլոկչեյն ծրագրավորումը վերաբերում է բլոկչեյն հավելվածների և համակարգերի ստեղծմանը: Ընդհանուր առմամբ, այն ձգտում է օգտագործել բլոկչեյն տեխնոլոգիայի բոլոր  եզակի առանձնահատկությունները՝ առկա խնդիրները լուծելու և նոր հնարավորություններ ստեղծելու համար:

Բլոկչեյնի ծրագրավորման օրինակ է smart պայմանագիրը: Դրանք համաձայնագրեր են երկու կողմերի միջև, ինչպես սովորական պայմանագրերը: Սակայն, ի տարբերություն սովորական պայմանագրերի, խելացի պայմանագրերը նաև բլոկչեյնում պահվող ծրագրեր են: Այս ծրագրերը գործարկվում են միայն այն դեպքում, երբ երկու կողմերն էլ կատարում են համաձայնագրի պայմաններն ու պահանջները: Այս ավտոմատացված համաձայնագիրն ապահովում է պայմանագրի ճիշտ կատարումը հենց տվյալ ժամանակում:

Smart պայմանագրերի դեպքում կարիք չկա, որպեսզի երրորդ կողմը հաստատի այն (օրինակ՝ իրավաբան կամ գանձապահ)։

Ի՞նչ է անում բլոկչեյն ծրագրավորողը

Նա software ծրագրավորող է, ով կենտրոնացած է հիմնականում բլոքչեյն տեխնոլոգիաների վրա։ Կա blockchain developer-ների 2 հիմնական մասնագիտացում՝

1․ Core բլոքչեյն ծրագրավորող

Բլոքչեյն համակարգի նախագծումն ու ծրագրավորումն ամբողջովին այս մասնագետների պատասխանատվությունն է։ Նրանք նախագծում են պրոտոկոլները, մշակում են անվտանգության օրինաչափություններ և վերահսկում են ամբողջ համակարգը։

2․ Բլոքչեյնի ծրագրային ապահովման ստեղծող

Blockchain-ի ծրագրային ապահովման ծրագրավորողները հավելվածներ են ստեղծում արդեն գոյություն ունեցող բլոկչեյն հարթակների համար: Նրանք զբաղվում են front-end և back-end ծրագրավորմամբ, ինչպես նաև սպասարկմամբ։

Ինչպե՞ս դառնալ բլոկչեյն ծրագրավորող

Եթե դու առհասարակ չգիտես ծրագրավորում, ապա անհրաժեշտ է նախ կոդավորում սովորել։ Կարող ես մի որոշ ժամանակ աշխատել որպես full-stack ծրագրավորող, այնուհետև կարելի է կենտրոնանալ բլոքչեյն տեխնոլոգիաների վրա։

Ահա անհրաժեշտ skill set-ը, որը հարկավոր է այս մասնագիտությանը լավագույնս տիրապետելու համար՝

  1. Ծրագրավորում

    Այս կետն իր մեջ ներառում է նաև ծրագրավորման համար կարևոր լեզուները, որոնց մասին տեղեկություն կարող ես գտնել մեր բլոգի նյութում:
  2. Կրիպտոգրաֆիա

    Կրիպտոգրաֆիան բլոկչեյն տեխնոլոգիայի անբաժանելի բաղադրիչն է: Այն պաշտպանում է տեղեկատվությունը` ապահովելով, որ հաղորդագրության բովանդակությունը տեսնի միայն ստացող կողմը:

  3. Smart պայմանագրեր

    Այս կետի կարևորության մասին արդեն խոսեցինք նյութի սկզբում։

  4. Տվյալների կառուցվածքի մասին գիտելիքներ

    Բլոքչեյն ծրագրավորողն աշխատելու է շատ տարբեր կառուցվածք ունեցող տվյալների հետ, այնպես որ պարտադիր է դրանց մասին տեղեկություններ և պրակտիկ գիտելիքներ ձեռք բերել։

  5. Բլոքչեյնի կառուցվածքի մասին գիտելիքներ

    Բլոկչեյնի յուրաքանչյուր տեսակի մասին պատկերացում կազմելն օգտակար է  հետագայում սեփական կարիերայի կենտրոնացման ոլորտը բացահայտելու համար: Ներկայումս բլոկչեյն կառուցվածքի չորս տեսակ կա՝ հանրային, մասնավոր, կոնսորցիումային և հիբրիդային:

Մենք միտումնավոր ոչինչ չենք գրել բլոքչեյն ծրագրավորողի աշխատավարձի չափի մասին, որպեսզի իմանալով, թե ինչ է բլոքչեյնը, հասկանաս մոտիվացիա ունե՞ս այս ոլորտ մուտք գործելու, թե ոչ։ Բլոքչեյնը շատ քմահաճ է և պահանջում է անընդհատ թարմացումներին հետևել, ինչպես նաև սիրել ոլորտն ու խիստ տեղեկացված լինել։ Եթե այս ամենը քեզ հարազատ է, ապա հաջողություն ենք մաղթում կարիերայիդ զարգացման մեջ։

Եթե այլ հետաքրքիր նյութեր ես ցանկանում կարդալ, այցելիր մեր բլոգ և բաժանորդագրվիր․ ամենահետաքրքիրը դեռ առջևում է։